MKALI wa muziki wa kizazi kipya nchini, Naseeb Abdul ‘Diamond Platinum’, amepigwa butwaa kuona ngoma yake ya ‘My Number One Remex’ ikipata mapokezi mazuri sokoni kwani awali alikuwa akihofia ubora wa picha.
Kupitia mitandao ya kijamii, Diamond aliandika kuwa video ya wimbo aliofanya nchini Nigeria chini ya mtayarishaji mahiri Clarence Peter, akisema hakuifanya vizuri kama alivyomwelekeza, hivyo aliamua kubaki nayo kwa wiki tatu kabla ya kuisambaza.
“Kiukweli video ya ‘My Number One Remix’ haikunivutia kabisa, nilivyomwelekeza mwandaaji ni tofauti na nilivyotaka, Davido (aliyemshirikisha kwenye wimbo huo) akasema hiyo ni nzuri, nisibadilishe, nikaamua kukubali lakini nilipanga nisiitoe, niangalie mambo mengine, wakati huo Nigeria ilikuwa ilishaanza kufanya vizuri.
“Baada ya kuja Tanzania, nilikaa nayo ndani wiki tatu huku Nigeria ikiwa inabamba sana, nilipowasiliana na Davido na uongozi wangu, walinishauri niisambaze tu, nashukuru Mungu, imefanya vizuri, nawashukuru sana Watanzania kwa sapoti yao,” aliandika mkali huyo.
Msanii huyo ni miongoni mwa wasanii ambao wanafanya vizuri katika tasnia ya muziki wa kizazi kipya kutokana na ubora wa kazi zake kama ‘Nitarejea’, ‘Kwetu Mbagala’, ‘Nataka kulewa’, ‘Nataka Kesho’ na nyinginezo.
chanzo:tz daima
No comments:
Post a Comment