Christian Bella kutua Diamond Musica Original

Siku chache tu baada ya kutangaza kumchukua mwimbaji na rapa, Ndanda Kosovo, uongozi wa bendi ya Diamond Musica Original umesema kuwa umemnasa mwimbaji Christian Bella aliyekuwa rais wa bendi ya Akudo.

Mkurugenzi wa bendi ya Diamond Musica Original, Ally Ocs ndiye aliyesema hayo alipokuwa akizungumza na gazeti la NIPASHE na kuongeza kuwa Bella atarajiwa kurejea usiku wa kuamikia leo jijini Dar es Salaam akitokea nje ya nchi alikokuwa kwa zaidi ya mwaka mmoja.

"Anatarajia kufanya mazoezi na wanamuziki wenzake wa bendi yetu kabla ya kupanda jukwaani Ijumaa ijayo pale Mzalendo Pub na kisha Julai 5 atapanda tena kwenye jukwaa letu pale Mango Garden," alisema Ocs.


Akifafanua zaidi, mkurugenzi huyo alisema kuwa wameandaa maonyesho hayo mawili kwa ajili ya Bella na kisha yatafuata mambo mengine ya kumpa mkataba wa kujiunga rasmi na bendi hiyo inayokuja kwa kasi.

"Tunaanza naye kwa mtindo huo na kisha kila kitu kitakuwa wazi mara baada ya maonyesho hayo mawili ambayo nina uhakika yanasubiriwa kwa hamu na mashabiki wa bendi yetu," alisema.

Aidha, alisema mwimbaji na rapa Ndanda Kosovo ambaye kwa sasa yuko kwao Kongo atatua Jumapili na atatambulishwa rasmi kwenye maonyesho hayo.

"Diamond Musica Original imedhamiria kuingia kwenye muziki wa ushindani ndiyo maana inachukua wanamuziki wenye uwezo wa kuivusha hapa ilipo hadi kufikia kwenye mafanikio," alisema.

Bendi hiyo inayojiita 'Wana Bao Tatu', iko kwenye maandalizi ya albamu ya kwanza iliyopewa jina la 'Hatua' ambayo baadhi ya nyimbo zake 'Shilingi', 'Upole wa Mapenzi', 'Fimbo la Mwaka', 'Kibali cha Mapenzi' na 'Deceiption'.
 chanzo:nipashe