MCHUNGAJI JELA KWA KUOMBA RUSHWA NGONO!!!!!!!!!!!!!!!!!!!!!!!

MAHAKAMA  ya hakimu mkazi mkoa  wa Iringa  jana imemhukumu kwenda jela miaka  sita, mwalimu  wa  Shule ya  Sekondari ya Pomerini wilaya ya Kilolo mkoani hapa, Michael Ngilangwa,  ambaye pia ni mchungaji  wa Kanisa la Kiinjili la Kilutheri Tanzania (KKKT) Dayosisi ya Njombe   kwa  kosa la kuomba rushwa ya ngono kwa mwanafunzi wake.

Hukumu hiyo ilitolewa na Hakimu Martha Mpaze baada ya mwalimu  huyo kupatikana na hatia katika   mashtaka mawili yaliyokuwa yakimkabili katika  kesi  iliyofunguliwa na Taasisi ya Kuzuia na Kupambana na Tushwa Tanzania (Takukuru) mkoa  wa Iringa.

Alisema  kuwa mahakama  hiyo imeridhia na ushahidi uliotolewa pamoja na vielelezo

vilivyowasilishwa mahakani hapo ili liwe fundisho kwa wengine mahakama hiyo inatoa adhabu kali dhidi yake.

Alisema katika  kosa la kwanza  mwalimu  huyo anadaiwa  kuomba rushwa ya ngono kwa mwanafunzi wake huyo jina (limehifadhiwa) ili kumsaidia masomo ambapo adhabu yake ni kulipa faini ya shilingi laki tano ama kutumikia kifungo cha mwaka mmoja jela, na kosa la pili ni kutaka kumbaka mwanafunzi huyo ambapo mahakama hiyo inamhukumu kwenda jela  miaka mitano

Hakimu Mpaze alisema  mahakama imetoa hukumu hiyo  kwa kuzingatia

maombi ya pande zote mbili, yaani wa mashtaka na mshtakiwa na kwamba

milango ya dhamana iko wazi iwapo mshtakiwa hajaridhika na uamuzi huo

wa mahakama.

Awali kabla ya hukumu hiyo mwendesha mashtaka wa  TAKUKURU mkoa wa Iringa, Nitume Mizizi,

aliiomba mahakama hiyo kutoa adhabu kali kwa mshtakiwa huyo kwa kuwa

kitendo alichokifanya si cha kiungwana na hasa ikizingatiwa aliacha

majukumu yake ya kazi na kuamua kumuomba rushwa ya ngono mwanafunzi

wake na kujaribu kumbaka.

Kwa upande wake mshtakiwa huyo aliiomba mahakama impunguzie mzigo wa

adhabu, kwa kuwa ana majukumu makubwa ya kifamilia, kwani anasomesha

wanafunzi wanne, wawili wakiwa yatima na pia anamhudumia mama yake

mzazi mwenye umri wa miaka 82.

Mwalimu Ngilangwa ambaye pia ni mchungaji wa Kanisa la Kilutheli Tanzania (KKT) dayosisi ya Njombe alitenda kosa hilo la kuomba rushwa ya ngono na kujaribu kumbaka

mwanafunzi wake huyo wa kidato cha kwanza mwenye umri wa miaka 14,

kati ya Agosti 10 na 11, mwaka 2011, katika nyumba ya kulala wageni ya

Wihanzi iliyoko mjini Iringa, kinyume na kifungu namba 25 cha sheria

ya kupambana na kuzuia rushwa ya mwaka 2007.